Gen 45 | ATA | STEP | Iuda uvivikalanu aloxo ne la Iosepu ne tamaxu mulokolaxu mukalu sou lexe utama. La sou muvikalane'i ta mitema sou xaixai noxou sou milaalaa mulai no ale ia anusisi ilo'a ta vimovimousi mixolu no nano ne sou anu mupala'alixu mulai noxi'a lexe anu Iosepu, vimo'a.

a 45:1Apo 7:13

Genesis 45

Iosepu Mupala'alixu Mulai Noxi'a Lexe Anu Vimo'a

1 ^aIuda uvivikalanu aloxo ne la Iosepu ne tamaxu mulokolaxu mukalu sou lexe utama. La sou muvikalane'i ta mitema sou xaixai noxou sou milaalaa mulai no ale ia anusisi ilo'a ta vimovimousi mixolu no nano ne sou anu mupala'alixu mulai noxi'a lexe anu Iosepu, vimo'a. 2 Xe mutaloxu iii mie 'olu'olu uasi manina la ta mitema ne Aixiputo ilo'a ta mitema sou ixoxolu no taasou tatananu tuala ne milomusou.

3 Iosepu muavuti la muvikalane'i ta vimovimou aloxo 'o, “Eni Iosepu a, loxovaa, mamilo a uxoxoolu laixesi?” Xe ta vimovimou milomu vaxa noxou aloxo ne, xe mi'ume misevile la milemolu ma'ia.

4 Anu muavuti la muvikalane'i, “Ngasuku une'e 'alai noxilo.” La ane'i misuku mulai noxou. Xe anu muavuti la muvikalane'i la, “Eni vivinge Iosepu a, ngingi menge ngeno'ilo ka nge'italoleli no avo'a ta mitema ne Midiani sou milotoleli, la sou mino'ilo mine'eleli ne Aixiputo 'o. 5 Ia mamu ngaxavutala piena mo mamu ngamaela no anu 'ilixo ane nge'oxo noxilo ne uasi, xo eni elavusou lexe Latauasi ane Anu molu mupalusilo sou eni euli mune'e 'o sou apamauline'i ta mitema. 6 Soli toxoxa'a te muxali 'o, uao tauu ie sou tamei ano 'o. Ia tauu ie tau've a uao uxolu 'o. Umomomo sou evile uxaxai mo ukookooli la uasi manina. 7 Lataua molusi mupalusilo sou euli ene'e 'o sou apamaulingengi ngongi'a ta xasixasinge ilo'a ta 'ilusulusungengi mo sou mamu ngasoisoli. Vote'i ane Lataua mu'oxonu 'o iou vile mo.

8 La sou eni emasaxa lexe ngingi ngalavu lexe ngingi ngapalusilo une'e 'o uasi. Lataua ane anu molu mupalusilo ene'e 'o. Anu mu'oxole exali loxo tatananu tuala ne Aixiputo momu loxo molomolo vile momu usaxila'u mo asaxila'a ta mitema no taasou ne ukalusi mo amitema sou saxisaxila'u si'a ta mitema no xalexalee tuatuala no nano ne Aixiputo ukalusi. 9 ^bIa alalae 'osi 'o, ngapalea mo ngalivu ulai noxou mamilo mo ngavikalanu aloxo 'o, ‘Vaikala ano 'o molu noxou 'iline Iosepu, muvikala aloxo 'o. Lataua muno'ilo mune'eleli ne Aixiputo 'o mole mu'oxole exali loxo itema sou saxisaxila'usi'a ta mitema no xalexalee tuatuala lai 'o. Ia naxoxoolu la uasi, napalea une'e noxilo. 10 Nane'e la sou naxolu ne Xosen 'alai noxilo. Ngongi'a ta 'ili'iline mo ta xasixasine mo ta sipsipmengi ilo'a ta mee, mo ta kau mo lavulavulutimengi tavu'alo ukalusi ne. 11 Nane'e naxolu ne Xosen 'o mo sou eni asaxila'ine, xo soli tila e muxali 'o ne, tauu iexu ta'uve a uao. Eni emasaxa aloxo ne, xo emasaxa lexe ngingi ngongi'a ta 'ili'iline mo ta xasixasine mo ta minemine latala ilo'a ta sipsipmeni, mo ta mee ilo'a ta kau ne mamu ngaxolu sou soli lai ne.’”

12 Xe muavuti la muvikalane'i ta vimovimou aloxo 'o la, “Emasaxa lexe ngingi mo vivilo Beniamini 'o, ngamaisilo mo ngalavusilo. Evile uasi, eni Iosepusi ane avivikalangengi 'o. 13 Ngalai mo ngavikalanu mamilo lexe eni ene'e exolu ne Aixiputo 'o la, mi'oxole exali itema tila vile manina. Mo ngavikalanuxu mimii tavu'alo e ngemaisou lai 'o. Ioxe ngapalea ulai mo ngano'u mamilo une'e 'o.”

14 Muvivikalane'i aloxo ne xe mukalu, la sou muavuti sou mulai mu'aulaxu vimou Beniamini la mutama. Xe anu Beniamini kalumo mu'aulaxu vimou la mutama. 15 Xe muavuti la musuku mulai noxi'a ta vimovimou 'ole sou mutimunu xalexalene'i. La tama 'a ululu'e noxi'a. Ilo'a mitama mukalu, la sou ta vimovimou tane'i laixe sou ilo'a mivivikala.

16 Xe ili'i xe a'alosi'a anu Iosepu ne ilo'a ta vimovimou mulai muxali noxou tatananu tuala ne Aixiputo ilo'a ta tatila sou xaixai noxou, la opone'i mu'osa misevile. 17 Xe anu tatananu tuala ne Aixiputo ne muavuti la muvikalanu Iosepu aloxo 'o, “Navikalane'i ta viivine mo itelo tivativasou la'ilalixa'a noxi'a ta donkii'a mo ilivu ulai no xalee lia ne Kanani, 18 mo ino'u maminge ilo'a ta mingemingengi ane mixoluxolu 'ole mo ilivu ine'e noxilo. La sou eni a'italonu lia xalee vile ane laixe mo lovoxu misevile lai 'o sou nga'ani laixe.

19 Navikalane'i mo ino'u karisi se'i ne Aixiputo 'o kalumo sou itelone'i ta 'ili'ili'a ilo'a ta semasemai'a mo maminge ngongi'a mo ino'a ine'ene'i 'o. 20 Ixavutala no anu mimii e i'umesou ne Kanani ne uasi, xo mimii ane lailaixe lai 'o ne, ane'i na'asi.”

21 Ioxe, ane'i Isilaeli ta 'olu miavuti la mi'oxo aloxo tatananu tuala mulemolu noxi'a ne. Iosepu mulosi'a karisi aloxo tatananu tuala mulemolu ne mo la'ilali kalumo sou i'ou tuxane'i no vote'i. 22 Mulosi'a ta vimovimou ne tokolomo vilevilesi, ia vimou Beniamini ne, mulosou ta'uve xe lamoli siliva alelaxu itemaxu mavulovexa vile mo itemaxu ta'uve (300). 23 Xe muavuti la musovane'i iu momu ta donki ta mulu mavulovexa vile la mutelonu mimii lailaixe ne Aixiputo noxi'a, xe ta donki ta sema mavulovexa vile kalumo la mutelonu momu la'ilalixu mo la'ilali se'i kalumo sou vote'i. 24 Mulosi'a mimii ne mukalu, la sou mupalusi'a sou milivu milai, la muvikalane'i aloxo 'o, “Ngalai ia nga'oto'oto no vote'i uasi.”

25 La sou ane'i milutu ne Aixiputo ne sou mitelai ne Kanani sou milai noxou mami'a Iakovo. 26 Milai mixali la mia'alou mami'a aloxo 'o, “Iosepu usoli uasi! Anu a uxoxoolu! Anu muxali loxo itema sou saxisaxila'u sou xalexalee tuatuala no nano ne Aixiputo mukalusi!” Xe mami'a mulomu aloxo la mukuluke la ulee muvava avile, ia anu muloxomale lexe ane'i ikakalavoinusi. 27 Ia ane'i mivikalanuxu vaivaikala e anu Iosepu muvikalane'ixu, xe mumaisou karisi e anu musova mune'e sou uno'u ulai ne Aixiputo, la tanu ne muai se'isisi loxo 'o. 28 Xe Isilaeli muavuti la muvikala aloxo 'o, “Manina musuku! Eni elavu lexe 'alixeni Iosepu usoli uasi. Anu laixe lexe eni alutu mo alai amaisou tei 'o, ka sou asoli.”